صيانة الـ 1000 وتـقريــر كـامل ... عن كل ما حدث ..
بسم الله الرحمن الرحيم
اللهم صل على محمد وعلى آله وصحبه أجمعين
السلام عليكم ورحمة الله وبركاته
تنوية : هاقول رائيي بكل صراحة وكل الي حصل معايا بالظبط من أول الحجز لـحد البيت ..
البداية :
خليت ايمن باشا يحجزلي وحجز لي يوم الأحد 22 - 8 - 2010 الساعة التاسعة صباحاً مع المهندس محمد عبد الهادي ..
بعد ما ايمن حجز لي .. كلمتني علي ما اتذكر ( الاستاذة داليا ) وتقولي ع اية الي بيتم وبيحصل في الصيانة وكدا ..
يوم الصيانة :
مش عارف اية الي صحاني بدري ونزلت بدري ووصلت حوالي 8 .. طبعا قعدت الف شويا ودخلت وقفت في الطابور قبل ما يفتحوا الباب بتاع الصيانة كنت تاني عربية ..
فتح البوابة كان حوالي تسعة وعشر دقائق ..
دخلت وجه المهندس بهاء ( المفروض انا ايمن حاجز لي مع محمد عبد الهادي ) ..
وقالي هانغير زيت وفلتر .. وهانشيك ... وكذا .. سالني لو عايز حاجة تانية ..
طلبت منة
1- عندي حدفة يمين ..
2- تزيق مع الفرامل ع السرعات البطيئة
3-فرامل اليد لما ارفعها 3 او 4 تكات كانت بتزحف برضوا
قالي في رمضان في شفتيين الصبح وليل .. تقدر حضرتك تستلم بليل ..
قولت له لاء صعب انا عايزها دلوقتي الصبح .. قالي خلاص ماشي الساعة واحدة ان شاء الله ...
كلمني المهندس بهاء حوالي الساعة 12 وعشرة وقالي العربية خلصت .. ( قلت ياه الحمدلله مش هاستني لواحدة يعني )
رحت علشان ادفع واستلم وامشي ..
ما نيل المطالب بالتمني .. استنيت لحوالي واحدة الا عشرة مستني المحاسب علشان كان بيصلي http://www.nilemotors.net/Nile/images/icons/icon9.gif
دفعت .. 181.5 وروحت اشوف العربية ..
طبعا كنت مستني تتغسل ويشيلوا لي الورقة بتاعة تفاصيل الشحن لحد دلوقتي متعلقة ..
العربية ماتغسلتش ( مافيش ماية ) .. يلا مش مشكلة اغسلها انا ..
مشيت ..
النتايج ..
1- عندي حدفة يمين ..
ولا كاني طلبت حاجة .. زي ما دخلت خرجت ( بس انا معشم نفسي ان الطريق مايل وهاجربها تاني )
2- تزيق مع الفرامل ع السرعات البطيئة
( وقت ما طلبت من المهندس الطلب ده .. قالي لي عادي مع الاتوماتيك )
3-فرامل اليد لما ارفعها 3 او 4 تكات كانت بتزحف برضوا
حسيت بمشوار فرامل اليد بقي اطول قبل ما اسمع التكات .. بس الصراحة ماجربتهاش ..
وصول البيت :
لما وصلت البيت وركنت العربية في الجراج .. سمعت صوت غريب وانا بقفل وبشيل الحاجات من العربية ..
قولت ابص تحت العربية لاقيتها بتنقط ماية .. طبعا ارتبكت .. وحسست عليها لقيتها ماية .. قولت الحمدلله مش زيت ..
كلمت ايمن قولت له .. اداني نمرة المهندس محمد عبد الهادي .. بس للاسف ماردش ..
اعدت ادور اكلم مين اكلم مين مالقتش قدامي غير الورق بتاع الصيانة .. لقيت نمرة الحجز قمت مكلمها ..
واخدت نمرة المهندس بهاء ..
كلمتة .. قالي حضرتك كنت مشغل التكيف
انا : ايوا
المهندس : ده لان الماية بتاعة التكيف اتجمعت ع السربنتينة ( او حاجة زي كدا ) ومع الرطوبة حصل كدا ..
انا : دي بقالها ربع ساعة بتنقط ..
المهندس : ايوا مانا قلت لحضرتك ده من التكيف .. مش بايدينا ..
انا : طيب شكرا مع السلامة ..
( علي فكرة اول مرة تنزل ماية معايا كدا من ساعة ما جبتها وكنت بسوق في اوقات اكتر رطوبة وحر من كدا ومسافات اطول )
سبت العربية وطلعت الصراحة .. وهانزل اشوفها قبل الفطار كدا ..
تقييم العربية ::
العربية بسم الله ما شاء الله ثابتة ثبات رهيب .. ومش محتاج اتكلم عن المميزات العديدة ..
بس هاتكلم ع الفرامل .. بسم الله ما شاء الله مش عارف الناس كانوا مش عجباهم لية ..
الفرامل انقذتني في موقفيين صعبيين جدا مرة في اكتوبر ومرة في المعادي ..
مرة اكتوبر كنت ماشي حوالي 85 فجاة لقيت العربيات الي قدامي وقفت .. فرملت طبعا علطول ( وانا بسيب دايما مسافة قدامي ودي افادتني شويا )
العربية من 85 الي حوالي 20 كيلو في لمح البصر
مرة المعادي .. عربية قدامي وانا لسة بدوس بنزين وطالع لقيت العربية الي قدامي بتلف يمين فجاة علشان ماتطلعش الكوبري وهوب دايس فرامل والحمد الله العربية وقفت في ساعتها .. والحمدلله ان كان ورايا سواق تاكسي متمكن وقف علطول هو التاني ..
معدل استهلاك البنزين قبل الالف حوالي 7 ونص كيلوا لكل 100 لتر ( قيادة معتدلة سرعة 80 الي 90 مع تشغيل التكيف )
طبعا دي اول عربية ليا .. ومضايق شويا من كذا خربوش وكام تجريحة للعربية ..
1- خدوش بتظهر لوحدها مش عارف بتيجي منين http://www.nilemotors.net/Nile/images/icons/icon8.gif
2-تجريحة كدا وانا بخش الجراج اتزنقت زنقة وحشة حكت في الحيط وعلمت ع العربية بالعرض مسافة حلوة ..
3-تجريحة يمين العربية من قالب طوب كبير .. وتجريحة تانية من قالب طوب كبير برضوا من قدام كانت انهاردة وانا رايح الصيانة ...
وبس .. وعايز اشكر ايمن الي حجز لي .. والي كلمتة اول ما لقيت العربية بتنقط ..
ودمتم